Эрдмийн баяр 2026

Номын нөхөд минь гурван жилийн сургалтаа дүүргэж эрдмийн баяраа (2026.05.01) хаврын адаг сарын шинийн 15-ны их адистид өдөр өргөн тэмдэглэлээ.

Сэтгэлийн амар амгаланг эрэлхийлэгч хэн бүхэн буддын эрдэм ухааныг судлах зайлшгүй шаардлага гардаг.

Манай төв “Бодь мөрийн зэрэг, чойр, төвөд хэл бичиг” хосолсон гурван жилийн сургалт явуулаад 6 оныг үджээ. Анх “Бодь мөрийн зэрэг” дагнан үзэж байсан бол явцын дунд “чойр”, “төвөд хэл бичиг” нэмснээр агуулга цар хүрээ тэлэхийн сац онол, практик хослуулж сургалтын чанарт анхааран ажиллаж байна.

Энэ хугацаанд эрдэм мэдлэгээ харамгүй заасан Н.Бямбадолжин, Ш.Пүрэв-Очир, С.Дэлгэрмөрөн тэргүүтэн багш нартаа, хичээнгүйлэн суралцсан нийт суралцагчид, тусалж дэмжсэн бүхэнд чинхүү талархал илэрхийлье.

Ер манай төвийн суралцагчид маань идэвх санаачилгатай, хичээнгүй, шинийг эрэлхийлэгч, их бүтээлч, дайчин хамт олон билээ.

• Илт онохуйн чимэг уншлага

• Их хөлгөн судрын уншлага

• Чухагт Эрдэнэ номын клуб

• Дарь эхийн мандал шиваа хурал

• Гурван гүрмийн монгол уншлага

• Цагаан сарын Рид хувилгааны их ерөөлийн хурал гээд номын нөхдийн санаачлан үүтгээд идэвхтэй хэрэгжүүлж буй хичээлээс гадуурх өч төднөөн бүтээлч үйл хэргийг дурдахад таатай байна.

Энэ жилийн ангийнхан маань эрдмийн баяраараа: Бурхан багшийн намтар, Бурхан багшийн намтар комик, Илт онохуйн чимэг (төвөд, кирил галигийн хамт) ивээн тэтгэж хэвлүүлсэнд төвийн зүгээс чинхүү талархсанаа илэрхийлье.

А.Мөнх-Оргил жорвонтой ангийн төгсөгчид та бүхний минь ажил үйлс бүтэмжтэй, номын үйлс дэлгэр байхын ерөөл талбия.