Оюунлаг иргэн төсөл

Уламжлалт ёс заншил, буддын сургаал, шинжлэх ухааны үндэслэл гурамсан агуулгатай онол практик хосолсон тусгай хөтөлбөрөөр анхан, дунд, ахисан түвшний сургалтад хамрагдаж, бясалгалаар бататгана. Энэхүү төслийнхөө хүрээнд МУИС-ийн философи, шашин судлалын тэнхим болоод МБШТ Гандантэгчлэн хийдийн дэргэдэх лавайн эгшиг 97.5 радиотой хамтран ажиллаж байна.

Зорилго:

Уламжлалт ёс заншлаа дээдэлсэн, аливаад шинжлэх ухаанчаар ханддаг, зөв мэдлэг сургаалыг эзэмшсэн, сэтгэл зүйн зөв хандлагатай соёлч боловсон, оюунлаг иргэнийг төрүүлэхэд хувь нэмэр оруулах явдал юм.

Та уг төсөлд хамрагдсанаар:

Хувь хүний талаас санаа бодол тайван амгалан болох, сайн төвлөрөх, дотроосоо гэрэлтэх, сэтгэл зүйн зөв хандлага, авах гээхүйн ухаан сууна, саад бэрхшээлийг даван туулах сэтгэлийн хаттай, асуудалд хүлээцтэй хандаж ухаалаг шийдвэрлэх, өөрийн алдаа дутагдлыг олж харах, засах чадвартай болох болно. Гэр бүлийн хувьд гэр бүлийн гишүүн бүрт хүндэтгэлтэй, хүлээцтэй хандаж ойлголцох чадвар сууна, бүлээн дулаан уур амьсгал аяндаа бий болно, аав ээжээ ачлах, үр хүүхдээ зөв хүмүүжүүлэх, хань ижлээ энэрэн халамжлах сэтгэл зүйн дадал сууна. Ажилдаа сэтгэлээсээ хандана, үүрэг хариуцлагаа гүнээ ухамсарладаг болно, хувийн асуудлаас урьдаж ажил төрлөө чухалчлан үзэж байгууллагынхаа хөгжил дэвшилд хоёргүй сэтгэлээр зүтгэх эерэг хандлагатай болно.